पूर्वराष्ट्रपतिकी छोरी अनिता भन्छिन् – जातको हैन,असल केटा चाहन्छु

संविधानले पूरै खुसी दिएन, पाँच विकासक्षेत्र नै ठीक
२०७२ कार्तिक १३ गते

राष्ट्रपति रामबरणकी छोरी अनिताले भनिन् अब बिहेविहेका लागि गुणवान पुरुषको खोजी गर्दै छु
१३ कात्तिक, काठमाण्डौ । पूर्वराष्ट्रपति डा. रामवरण यादवकी छोरी अनिता यादवले आफुले विवाहका लागि उच्च जातको नभई असल केटा खोजिरहेको बताएकी छिन् ।
संविधान बनेपछि विवाह गर्ने योजनाका कारण आफ्नो विवाह पछि धकेलिएको बताउँदै अनिताले भनिन् -‘संविधान बनेपछि बिबाह गर्ने योजनामा थिएँ, संविधान पनि आयो, अब हेर्दै जाउँ ।’
विवाहका लागि तपाईको रोजाईमा कस्ता पुरुष छन् भन्ने प्रश्नमा अनिताले भनिन्- मेरो रोजाईमा साधारण ब्यक्ति नै पर्छन्, इमान्दार होस् मलाई बुझोस् भन्ने नै हो । क्लास र कास्ट नै ठूलो कुरा हैन । असल होस् ।’
न्यूज २४ टीभीसँगको अन्तरवार्तामा अनिताले भनिन- भगवानले जोडी मिलाएको हुन्छ भनिन्छ, सायद मेरो समय नआएर होला विवाह हुन नसकेको ।’

छोरीको बिहे भैदियोस् भन्ने बुबाको चाहना भए पनि विवाहका लागि कुनै दबाव नदिएको उनले बताइन् ।
आफुले जातभातको कुरा नमान्ने र सानैदेखि त्यसरी नै हुर्किएको भन्दै उनले पछिल्लो समयमा देखिएको जातीय मुद्दाप्रति चिन्ता जनाइन् ।
‘जस जसले जातको कुरा गरिरहनुभएको छ, त्यसले बिभाजन र बिनासतिर लगिरहेको छ । सबैको कल्चरबाट केही न केही कुरा सिकिरहेको हुन्छ । मिलेर बसेको नै राम्रो हुन्छ ।’ उनले भनिन्- ‘जो कसैले हाम्रो समाजलाई जातका आधारमा विभाजन गर्न खोज्दै हुनुहुन्छ त्यसले मलाई दुखित बनाएको छ ।’
आठ वर्ष शीतलनिवासमा बसेर अहिले बाहिरिँदा कुनै दुःख लागेको छ भन्ने प्रश्नमा उनले भनिन्- ‘कुनै दुःख छैन, किनकि हामीलाई थाहा थियो एक दिन बाहिरिनुपर्छ ।’
अब एनजीओ र योगा

योगा प्रशिक्षणमासमेत संलग्न रहेकी अनिताले शीतलनिवासबाट बाहिरिएपछि योगा र समाजसेवाका क्षेत्रमा काम गर्ने बताइन् । ‘सानो एनजीओ छ गाउँमा, पहिले बुबाले चलाउनुहुन्थ्यो, अब म त्यसलाई चलाउने तयारीमा छु ।’ उनले भनिन्-‘अब योगा र एनजीओलाई अगाडि बढाउन चाहान्छु ।’
के तपाई राजनीतिमा आउने सोचमा हुनुहुन्छ ? भन्ने प्रश्नमा उनले भनिन्- म भविष्य मा के गर्छु त्यो त म भन्न सक्दिँन । म कुनै पार्टीमा त्यति विश्वास गर्दिन, ब्यक्ति राम्रो हुनुपर्छ । तपाईहामीले ठूलो कुरा गरेर हुँदैन, व्यवहारमा देखाउनुपर्छ । हामी जे बोल्छौं, त्यसमा अडियौं भने केही न केही हामी सबैले योगदान दिन सक्छौं र हाम्रो नेपाल राम्रो हुन सक्छ होला ।’
राष्ट्रपतिको छोरी भएका कारण राजनीतिमा आए हुन्थ्यो भन्ने चाहना होला नि भन्ने प्रश्नमा अनिता भन्छिन्- मेरा बुबा प्रथम राष्ट्रपति हुनुभयो भनेर धेरै नै गर्व छ, तर म उहाँबाट अलग राखेर हेर्छु । मसँग जे छ त्यहीबाट चिनाउँछु । मप्रति उहाँको त्यस्तो कुनै अपेक्षा छैन, असल बन्नुपर्छ भन्ने त हो । उहाँले पनि ठूलो हैन असल मानिस बन भनेर भन्नुहुन्छ ।’
संविधानले खुसी दिएन

अनिताले देशले संविधान पाए पनि आफुलाई पुरै खुसी बनाउन नसकेको बताइन् । ‘संविधान त आयो तर म पुरै खुसी छैन, पुरै देशमा खुसी हुन पाएको भए हुन्थ्यो ।’ उनले भनिन्-‘तराईमा जुन अवरोध भइरहेको छ, त्यसले मलाई दुःख लागेको छ ।’
पाँच विकासक्षेत्र नै ठीक थियो

अनिताले नयाँ संविधानले प्रस्ताव गरेको संघीय संरचनाप्रति पनि बेखुसी प्रकट गरिन् । पहिलेकै पाँच बिकासक्षेत्रको अवधारणा आफुलाई मन परेको उनले बताइन ।
‘जुन पहिलेको पाँच विकासक्षेत्र बाँडेको थियो नै राम्रो थियो । सबै मिलेर वसेका थियौं, एउटा साझा फुलवारी जस्तो थियो । केही भेदभाव थिएन ।’ उनले भनिन्- अहिले जुन जातीयताको कुरा आइरहेको त्यो मलाई मन परेको छैन । किनभने म त्यो मान्दिन, म गुणले मानिसलाई चिन्ने गर्छु, कुन जातबाट आएको छ भन्नेले हैन । मनिस जातले हैन, गुणले ठूलो हुन्छ भन्ने कुरा छ । कसैले मेहनत गर्छ भने कहाँबाट कहाँ पुग्न सक्छ तर कोही ठूलो जातको छ, तर मेहनत गर्दैन भने उ त्यहीँ रहन्छ भन्ने ब्यक्तिगत बुझाइ छ ।’onlinekhabar