भगवान रामविरुद्ध महिला हिंसाको मुद्दा !

भोलिबाट अदालतमा सुनुवाई हुने
एजेन्सी : हिन्दु धर्मावलम्बीका लागि भगवान राम आदर्श पुरुष हुन् । तर, यिनै आदर्श पुरुषविरुद्ध अदालतमा मुद्दा परेको छ ।

बिहारको सीतामढीस्थित व्यवहार न्यायलयमा वकील चन्दन सिंहले आइतबार भगवान रामविरुद्ध मुद्दा दर्ता गराएका हुन् ।

सन् २०१२ मा एउटा हिन्दी फिल्म ओ माई गड (ओएमजी) आएको थियो । जसमा कान्जी भाइ नामका मानिसले भगवानविरुद्ध मुद्दा हालेका थिए ।

यो फिल्मले त व्यंग्य मात्रै गरेको थियो । तर अहिले भने भगवानविरुद्ध वकीलले मुद्दा नै दर्ता गराएका हुन् ।

उनले हिन्दु धर्मावलम्बीले धेरै आस्था गरेर पूजा गर्ने राम भगवानविरुद्ध हालेपछि अदालतले सोमबार सुनुवाईका लागि दुबै पक्षलाई बोलाएको छ ।

यो घटना बिहारको सीतामढीस्थित प्रमुख न्यायिक अधिकारी श्याम बिहारीको अदालतमा दर्ता भएको हो ।

यो मुद्दा दर्ता गराउने व्यक्ति स्थानीय वकील ठाकुर चन्दन सिंह हुन् । उनले राम भगवानबाट महिलामाथि उत्पीडन भएको जिकिर गरेका छन् ।

एक धोबीको कुरा सनेकै भरमा भगवान रामले आफ्नी पत्नी सीतालाई घरबाट निकालेको दाबी वकीलले गरेका छन् । यस्तो गरेर रामले पत्नि सीतामाथि अत्याचार गरी वनवास पठाएको उनको दाबी छ ।

मुद्दा दर्ता गराउने वकील चन्दनले मिथिलामा जन्मिएकी सीतामाथि अयोध्याका राजाले अन्याय गरेका थिए । सीतालाई न्याय दिलाउनका लागि यो मुद्दा दर्ता गरिएको उनको तर्क छ । 'मेरो उद्धेश्य केबल सीतालाई न्याय दिलाउनु हो', उनले भनेका छन्, 'कुनै धर्म या कसैको भावनामाथि ठेस पुर्याउनु मेरो उद्धेश्य होइन ।'

चन्दन सिंहले स्त्रीमाथि उत्पीडनको श्रृंखला त्रेता युगबाटै शुरु भएको बताए । 'जबसम्म त्रेता युगका नारीलाई न्या मिल्दैन, तबसम्म कलियुगका नारीले न्याय पाउँदैनन्', उनले भनेका छन् ।

यी वकीलले भगवान रामको विवेकमाथि पनि प्रश्न उठाउँदै यसबारे बहस हुनुपर्ने पनि माग गरेका छन् ।
annapurnapost