वीरगंजमा भएको प्रहरी दमनको विरोधमा गौरमा फट्टा जुलुस

हुलाकी न्यूज, रौतहट, १६ कार्तिक । वीरगंजमा भएको प्रहरी दमनको विरोधमा मधेशका सबैजसो जिल्लामा प्रदर्शन चर्किएको छ । सोमबार बिहानै वीरगंज-रक्सौल नाकामा रहेको मैत्री पुलमा प्रहरीले प्रदर्शनकारीमाथि आक्रमण गरेपछि सबैजसो जिल्लामा विरोध प्रदर्शन भएका छन् ।

वीरगंज घटनाको विरोधमा रौतहटका युवाहरु आक्रोशित भएका छन् । जिल्ला सदरमुकाम गौरमा आक्रोेशित युवाहरुले फट्टा जुलुस निकालेका छन् । ठूलो संख्यामा युवाहरु सडकमा ओर्लिएका छन् ।

यसैबीच मधेशी मोर्चाले मधेशभरी आन्दोलन सशक्त बनाउने निर्णय गरेपछि जिल्ला प्रशासन कार्यालय रुपन्देहीले सदरमुकाम भैरहवामा निषेधित क्षेत्र घोषणा गरेको छ । सोमबार साँझ ६ बजेदेखि कार्तिक २० गते साँझ ६ बजेसम्मका लागि निषेधित क्षेत्र तोकिएको प्रमुख जिल्ला अधिकारी विष्णुप्रसाद ढकालले बताएका छन् ।