काठमाडौंः शिवरात्रिका अवसरमा सोमबार साँझ पूर्वराजा ज्ञानेन्द्र शाह पशुपतिनाथमा पुग्दा उनका समर्थकहरुले चर्को नाराबाजी गरेका छन् ।
साँझ ६ बजेर ४५ मिनेटमा पशुपतिनाथ दर्शन गर्न छिरेका उनी करिब १० मिनेटपछि पशुपतिबाट निस्कँदा सयौं समर्थकहरुले घेरेर नाराबाजी गरेका हुन् ।
राष्ट्रपति विद्या भण्डारी र उपराष्ट्रपति नन्दबहादुर पुनले दर्शन गरेर फर्केको एक घन्टापछि पशुपतिनाथमा पुग्दा ज्ञानेन्द्रको पक्षमा सयौं समर्थकले नाराबाजी गरेका हुन् ।
बाजागाजसहितको टोली लिएर पशुपति दर्शन गर्न सजिलै पसेका पूर्वराजा शाह निस्कने क्रममा भने सयौं समर्थकले घेरेपछि प्रहरीलाई सुरक्षाव्यवस्था मिलाउन हम्मे परेको थियो ।
पूर्वराजा शाहका समर्थकहरुले पशुपतिनाथ परिसरमा करिब २० मिनेटसम्म उनको पक्षमा नाराबाजी गरे ।
समर्थकहरुले हाम्रो राजा हाम्रो देश प्राणभन्दा प्यारो छ, श्री ५ महाराजधिराज सरकारको जय र राजा आऊ देश बचाऊ भन्दै चर्का नारा लगाए ।
प्रहरीको कडा सुक्षाबीच पूर्वराजा शाह साँझ सात बजे पशुपतिनाथ परिसरबाट बाहिरिएका छन् ।
annapurnapost
Post a Comment