टर्कीको राजधानी इस्तानबुलमा आगामी मे २३ र २४ मा आयोजना हुने ‘वल्र्ड ह्युमेनिटेरियन समिट' मा नेपालमा गएको भूकम्प र पुनर्निर्माणको प्रयासबारे पनि छलफल हुँदैछ ।
संयुक्त राष्ट्रसंघको सहकार्यमा टर्कीले आयोजना गर्ने उक्त सम्मेलनमा नेपालले पनि सहभागिता जनाउने भएको छ ।
‘वल्र्ड ह्युमेनिटेरियन समिट' मा नेपालको भूकम्पपछिको अवस्थाबारे चर्चा हुने भएकाले त्यस विषयमा यहाँको राजनीतिक नेतृत्वसँग छलफल गर्न उपमहासचिव इलियास्सन नेपाल आउन लागेको बताइएको छ ।
संयुक्त राष्ट्रसंघीय महासचिव बान की मुनपछि दोस्रो बरियतामा रहेका राष्ट्रसंघीय उच्च अधिकारी इलियास्सनले राष्ट्रपति विद्यादेवी भण्डारी, प्रधानमन्त्री केपी शर्मा ओली र परराष्ट्रमन्त्री कमल थापासँग भेट्ने कार्यक्रम छ ।
तीनदिने नेपाल भ्रमणका क्रममा इलियास्सनले भूकम्प प्रभावित केही ठाउँको समेत अवलोकन गर्नेछन् । राष्ट्रसंघले नेपालमा भूकम्पपछिको उद्धार, राहत र पुनर्निर्माणमा सहयोग गरेको छ ।
annapurnapost
Post a Comment