धरान: नेपाल पुलिस क्लवसँग विराट गोल्डकपमा हारेको बदला लिँदै धरानमा सम्पन्न १८ औं अन्तर्राष्ट्रिय आमन्त्रण बुढासुबबा गोल्डकप फुटबल प्रतियोगिताको उपाधि मनाङ मस्र्याङदी क्लवले उचालेको छ ।
शनिवार धरानको एन्फा टेक्निकल सेन्टरको खेल मैदानमा सम्पन्न प्रतियोगितामा मनाङले नेपाल पुलिस क्लवविरुद्ध १–० गोलको नतिजा निकाल्दै उपाधिमाथि तेस्रो पटक कब्जा जमाएको हो ।
मनाङको जितमा प्रतियोगिताको ८७ औं मिनेटमा अफ्रिकन खेलाडी एपिज ओलावालेले गरेको गोल नै मनाङलाई उपाधि उचाल्न पर्याप्त बन्यो ।हेमन गुरुङको कर्णर किक बललाई अनन्त तामाङको पासमा ओलावालेले प्रहार गरेको बल गोलमा परिणत भएको थियो । मनाङले यसअघि २०६० को छैटौ र २०६७को तेह्रौं संस्करणको उपाधि पनि जितेको थियो ।
बुढासुब्बा गोल्डकपको उपाधिसँगै मनाङले नगद ४ लाख रुपैयाँ पुरस्कार प्राप्त गरेको छ भने उपविजेता पुलिसले २ लाखमा चित्त बुझाएको छ । अधिकांश व्यक्तिगत विधाका पुरस्कार पनि मनाङकै खेलाडीले जितेका छन् ।
फाइनल प्रतियोगिताको म्यान अफ दि म्याच र सर्वाधिक गोलकर्ताको उपाधि मनाङका एपिज आलावाले नै घोषित भए । प्रतियोगिताभर ५ गोल गरेका उनले सर्वाधिक गोलकर्ताको २५ हजार नगद र म्यान अफ दि म्याचको नगद ५ हजार पुरस्कार प्राप्त गरेका छन् ।
प्रतियोगिताभरको उत्कृष्ट खेलाडी र गोलरक्षकको उपाधि मनाङका किरण चेम्जोङ घोषित भए । उनले उत्कृष्ट गोल रक्षकको नगद ११ हजारसहित १२५ सिसीको यामाहा मोटरसाइकल पुरस्कार प्राप्त गरेका छन् । उत्कृष्ट मिडफिल्डर र स्टाईकरमा क्रमश मनाङका हेमन्त गुरुङ अनिल गुरुङ घोषित भए ।
प्रतियोगिताको उत्कृष्ट प्रशिक्षकमा मनाङका छिरिङ गुरुङ घोषित भए । उत्कृष्ट रक्षकमा पुलिसका सुरज विक घोषित भए ।विजयी खेलाडिहरुले जनही ११ हजार पुरस्कार प्राप्त गरेका छन् ।
विजयी खेलाडीहरुलाई राखेपका सदस्य सचिव केशव विष्टले पुरस्कार वितरण गरे । यो जितसँगै मनाङले जारी सिजनका तीनवटा उपाधि जितेको छ । मनाङले यसअघि पोखराको आहारारा गोल्डकप र हेटौडाको सुमन भोमजन स्मृति अन्तर्राष्टिय गोल्डकपको उपाधि जितेको हो ।
प्रतियोगिताभर उत्कृष्ट पर्दशन गरेको पुलिसले मनाङ विरुद्ध पाएको गोल गर्ने अवसरलाई सदुपयोग गर्न नसक्दा उपािध चुम्ने सपना अधुरो बन्यो ।
पुलिसका जुमनु राई ४२ औं मिनेटमा मनाङको गोल पोष्टमा गोलकिपर किरण चेम्जोङ मात्र भएको अवस्थामा गोल गर्न चुकेका थिए । भोला सिलवालको पासमा डी बक्स एरियाबाट जुमनुले प्रहार गरेको उत्कृष्ट प्रहारलाई मनाङका गोल किपर किरणले सफल बचाउ गरे ।
खेलको २३ औं मिनेटमा पुलिसका रविन श्रेष्ठको प्रहार मनाङका विराज महर्जनले विफल पारे । ४० औं मिनेटमा पुलिसका विनोद कार्कीको प्रहार मनाङका गोल किपर किरणले बचाए ।
मनाङले पनि पुलिसविरुद्ध गोल गर्ने आधा दर्जन अवसर खेर फालेको थियो । खेलको १७ औं २८ औं मिनेटमा मनाङका एफिज ओलावाले गोल गर्न असफल भए ।
२१ औ मिनेटमा अनिल गुरुङको प्रहार पुलिसका गोलकिपर विशाल श्रेष्ठले विफल पारे । ४३ औं मिनेटमा मनाङका सिसोको प्रहार र ५१ औं मिनेटमा हेमन गुरुङको कडा प्रहार पुलिसको पोष्टमाथिबाट हुइँकियो । ६४ औं मिनेटमा मनाङका अनन्त तामाङको प्रहार पुलिसका अजित भण्डारीले बचाए ।
मनाङका प्रशिक्षक छिरिङ लामाले बलियो प्रतिद्धन्दी पुलिससँग आफ्ना खेलाडिले सर्घषपूर्ण जित हाँसिल गरेको बताए । उनले खेलाडीले अत्यन्तै राम्रो पर्दशन गरेपनि गोल गर्ने अन्य अबसरलाई खेर फालेको बताए ।
पुलिसका प्रशिक्षक अनन्तराज थापाले खेलाडिले राम्रो खेल पर्दशन गरेपनि अन्तिम समयमा मनाङको गोल खानु नै पराजयको कारण बनेको बताए । उनले आफ्ना खेलाडीले पाएको गोल गर्ने अवसरलाई सदुपयोग नगरेपनि खेलबाट सन्तुष्टी मिलेको बताए ।
annapurnapost
Post a Comment