भारतमा जारी बाह्रौं दक्षिण एसियाली खेलकुदमा सनसनी मच्चाउँदै नेपालका लागी चार पद हात पारेकी गौरिका सिंहलाई राज्यले कुनै लगानी गरेको छैन । आफ्नै लगानीमा लण्डन बसेर पौडीको प्रशिक्षण लिँदै आएकी गौरिकाले चौथो मेडल जितेको दिन भनेकी थिइन्–‘मलाई अप्रत्यासित खुसी लागेको छ , यो नतिजा आउनुमा मैले म आफैं र देशप्रति गर्व गरेको छु ।’ बाह्रौं सागमा चार मेडल जित्ने १३ बर्षिया गौरिका सिंहसंग रातोपाटीले गरेको कुराकानी :
तपाईलाई दक्षिण एशियाली खेलकुदमा यस्तो सफलता हात पार्दा कस्तो अनुभव भइरहेको छ ?
म त सुरुआतमा स्तब्धै भएँ । त्यसपछि आफ्नो र देशको लागि मेडल जितेकोमा गौरवान्वित छु ।
कहिलेबाट पौडीको करियर सुरु भयो ?
लण्डनस्थित बर्नेट कोप्थाल स्विमिङ क्लबमा सन् २०११ बाटै पौडिन शुरु गरेको थिएँ । नेपालमा सन् २०१४ मा राष्ट्रिय च्याम्पियनसिप खेले र पदक जिते । त्यहीँबाट औपचारिक रुपमा करियर शुरु भयो ।
तपाईले यूकेमा प्रशिक्षण गर्दा के–कस्ता अवसर पाउनुभयो ? अनि नेपालका प्रतिस्पर्धीसँग प्रतिस्पर्धा गर्दा नेपाली स्विमिङको चुनौतीहरु के–के रहेछन् ?
तयारीको समस्या र पौडी पोखरीको अभाव नेपाली स्विमिङका लागि ठूलो चुनौती रहेछ । तर बेलायतमा मैले बर्नेट कोप्थाल स्विमिङ क्लबमा राम्रा प्रशिक्षकहरुसँग प्रशिक्षण गर्ने मौका पाएँ । लण्डनस्थित मेरो स्कुल हाब्स गल्र्स स्कुलले स्विमिङमा सधैँ सहयोग ग¥यो ।
तपाईका अभिभावक र करियारमा अह्म भूमिका खेल्ने प्रशिक्षक तथा सहयोगी र शुभचिन्तकलाई के भन्न चाहनुहुन्छ ?
म मेरो बाबु र आमासँग सधै नजिक हुन्छु । मेरो पढाई र स्विमिङ प्रशिक्षणलाई ब्यालेन्समा राख्न उहाँहरुले ठूलो मेहिनत गर्नु भएको छ । मेरो सफलता म मेरा प्रशिक्षक रायस ग्रोम्ली र क्रिष्ट्रिन ग्रीनीमा समपर्ण गर्न चाहन्छु । देश तथा विदेशमा रहेका नेपाली जनताले मलाई माया गर्नुभएको छ । नेपाल पछिल्लो समय निकै कठीन अवस्थाबाट गुज्रिएको छ । मलाई आशा छ मेरो जीतले जनतालाई दुःखको घडीमा सानो खुसी साट्ने मौका जुरेको छ ।
तपाईको भविष्यको योजना के छ ? ओलम्पिकको बारेमा सोच्नुभएको छ ?
म कडा मेहिनत गर्न चाहन्छु । अन्तर्राष्ट्रिय रुपमा जूनसुकै प्रतियोगिता खेलेपनि म नेपाललाई राम्रो नतिजा दिलाउन प्रयासरत हुन्छु । मैले सन् २०१६ को ओलम्पिक खेल्न पाउने आशा राखेको छु । रियो दि जेनरियोमा यसै वर्ष हुने ओलम्पिक र सन् २०२० को टोकियो ओलम्पिकका लागि मेरो तयारी हुनेछ ।
ratopati
Post a Comment