एनेकपा माओवादीका प्रवक्ता दिनानाथ शर्माले अव नेपाली कांग्रेसको नेतृत्वमा राष्ट्रिय सरकार गठन हुने दावी गरेका छन् । संविधान कार्यान्वयनका लागि मधेसवादी दलहरुलाई समेत समेटेर कांग्रेस नेतृत्वमा नयाँ राष्ट्रिय सरकार गठन हुने उनको दावी छ ।
प्रधानमन्त्री केपी शर्मा ओली भारतबाट फर्के लगत्तै प्रवक्ता शर्माको यस्तो भनाइ आएको हो । शुक्रबार सुनसरीको इटहरीमा सञ्चारकर्मीसँग बोल्दै शर्माले अवको सरकारमा संघीय समाजवादी पार्टीका अध्यक्ष उपेन्द्र यादव लगायतका मधेसी नेताहरु समेत सम्मिलित हुने दावी गरे ।
भारतबाट फर्किएका ओलीको भ्रमणलाई सामान्य र नियमित बताएका प्रवक्ता शर्माले तत्काल सरकारबाट बाहिरिने तयारीमा एमाओवादी नरहेको भन्न छुटाएनन् ।
राष्ट्रिय सरकार कहिले गठन हुने भन्ने विषयमा पनि उनले स्पष्ट पारेनन् ।
यस अघि एमाओवादी अध्यक्ष पुष्पकमल दाहाल प्रचण्डले पनि राष्ट्रिय सरकारको कुरा उठाउँदै आएका छन् । अवको सरकारको नेतृत्व महाधिवेशनपछिको कांग्रेसले गर्ने संकेत पनि उनले गरिसकेका छन् ।
nepaliheadlines
Post a Comment