हानिकारक तत्व मिसिएको उत्पादन बेचेको भन्दै जोनसनलाई जरिवाना

जोनसन एण्ड जोनसनले अमेरिकाकी एक महिलाको परिवारलाई सात करोड २० लाख अमेरिकी डलर अर्थात सात अर्ब ९२ करोड नेपाली रुपैयाँ जरिवाना तिर्नु पर्ने भएको छ । अलाबामाकी ज्याकलिन फक्सको पाठेघरको क्यान्सरका कारण ज्यान गएको थियो ।

गएको वर्षको अक्टोबरमा ६२ वर्षकी फक्सको ज्यान गएपछि उहाँको परिवारले जोनसन एण्ड जोनसन विरुद्ध मुद्दा दायर गरेको थियो । फक्सको परिवारले उहाँको निधन जोनसन एण्ड जोनसनको पाउडर तथा साबुनको प्रयोगका कारण क्यान्सर लागेर भएको भन्दै मुद्दा दायर गरेका थिए । जोनसनले उत्पादन गर्ने सामग्रीमा टेलकम पाउडर हुने र त्यसले क्यान्सर निम्त्याउने भएकाले फक्सको परिवारको दाबीलाई सदर गर्दै मिसोरी राज्य अदालतले जोनसन एण्ड जोनसनलाई जरिवाना तिर्न आदेश दिएको हो । अलाबामामा बस्दै आएकी फक्सको परिवारले गएको ३५ वर्षदेखि सरसफाइका लागि जोनसनको उत्पादन प्रयोग गर्ने गरेको थियो । फक्सको तीन वर्षको उपचारपछि गएको अक्टोबरमा निधन भएको थियो ।
फक्सको निधन पछि उहाँको परिवारले जोनसनको उत्पादनका कारण उहाँलाई क्यान्सर लागेको भन्दै अदालतमा मुद्दा दायर गरेका थिए । तीन हप्ताको सुनुवाइपछि अदालतले जोनसनले उपभोक्तालाई झुक्याएको तथा हानिकारक तत्व मिसिएको उत्पादन बेचेकोमा दोषी ठहर गर्दै जरिवाना तिराएको फैसला सुनाएको हो ।
जोनसन विरुद्ध अहिले मिसोरी राज्य अदालतमा एक हजार भन्दा धेरै मुद्दा दर्ता भएका छन् । यस्तै न्यु जर्सीमा पनि दुई सय भन्दा धेरै मुद्दा दर्ता भएका छन् । जोनसनले बेबी पाउडर, साबुन तथा ट्वाइलेट क्लिनरसहितका आफ्ना उत्पादनमा ट्यालकम प्रयोग गर्ने गरेको छ । यसले क्यान्सर लाग्ने खतरा रहने वैज्ञानिकले बताएका छन् ।
news24nepal