यो लगभग नेपालको हातबाट फुस्केको म्याच थियो । खेल सकिन दुई मिनेट बाँकी रहँदासम्म नेपाल एक गोलले पछि मात्र परेको थिएन, नियमित समयको ६५ औं मिनेटबाटै एक खेलाडी रेड कार्ड खाएर गुमाएको अवस्थामा थियो । कुनै पनि स्तरको अन्तर्राष्ट्रिय फुटबलमा अन्तिम दुई मिनेटमा दुई गोल गरेर नतिजा उल्टाउन सानोतिनो चमत्कारै गर्नुपर्छ । नेपालले चमत्कार शैलीमै जित हत्यायो ।
आफूलाई फुटबलरभन्दा पहिले नेपाली आर्मी हुँ भन्न रुचाउने नवयुगले फुटबल मैदानभित्र साँच्चिकै लडाकु शैली देखाए । अन्तिम दुई मिनेटमा माल्दिभ्सलाई पाखा लगाउँदै उनले १७ वर्षपछि साग फुटबलको फाइनलमा नेपाललाई पुर्याए र भारतसितको लोभलाग्दो भिडन्त निश्चित गरे ।५ खेलमा १० गोल, ३ ह्याट्रिक
गतिलो स्ट्राइकरको अभावमा छट्पटाइरहेको नेपाली फुटबललाई नवयुगको आगमनले त्राण दिएको छ । आफूले खेलेका पछिल्ला ५ अन्तर्राष्ट्रिय खेलमा ३ ह्याट्रिकसहित उनले १० गोल नेपालका लागि गरिसकेका छन् । नेपाली फुटबलको पृष्ठभूमिमा यो अविश्वसनीय सफलता हो ।
अन्तर्राष्ट्रिय म्याचमा नेपालका लागि सर्वाधिक व्यक्तिगत गोलसंख्या रहेको छ १३ । हरि खड्काले १२ वर्ष संघर्ष गरेर बनाएको सो रेकर्ड बनाएका हुन् ।
जबकि नवयुगले अन्तर्राष्ट्रिय म्याच खेल्न थालेको एक वर्ष मात्र भयो । यद्यपि, साग गेम्स अन्तरगतको फुटबललाई फिफाले औपचारिक मान्यता नदिएकाले नवयुगको अन्तर्राष्ट्रिय गोल संख्यामा पछिल्ला दुई ह्याट्रिक काउन्ट हुँदैनन् ।यीनै नवयुग हुन्, जो एक महिना अगाडि नेपाललाई २३ वर्षपछिको पहिलो अन्तर्राष्ट्रिय उपाधि दिलाउने अभियानको प्रमुख सूत्रधार थिए । बंगलादेशमा एक माघको पहिलो साता सम्पन्न बंगबन्धु कपको सेमिफाइनलमा उनले माल्दिभ्सविरुद्ध ह्याटि्रक गर्दै अन्तर्राष्ट्रिय फुटबलमा आफ्नो धमाका सुरु गरेका थिए । फाइनलमा बहराइनलाई हराउने क्रममा उनले आफ्नो खातामा एक गोल थपे । सो प्रतियोगितामा उनले सबैभन्दा मूल्यवान खेलाडीको उपाधि पनि पाए ।
बंगबन्धु कपमा नवयुगले पाएको सफलता क्षणिक वा भाग्यशाली मात्र थियो कि भनेर आशंका गर्नेहरुले जवाफका लागि लामो समय कुर्नुपरेन । साग फुटबलको पहिलो म्याचमा भुटानविरुद्ध उनले हाँसिहाँसी आफ्नो दोस्रो ह्याट्रिक पूरा गरे ।
Nepali-Football1
उनीअघि कुनै पनि नेपाली खेलाडीले यो सफलता हासिल गरेका थिएनन् । जारी साग फुटबलमा दुई ह्याटि्रक गोल गर्ने उनी एक्ला खेलाडी हुन् ।
नवयुग र विमलको तुलना
बंगबन्धु कपमा खेल्न जानुअघिसम्म नेपाली टोलि विमल घर्तिमगरमा अत्यधिक निर्भर रहेको महसुस गरिएको थियो । बिमलको प्रर्दशन अपेक्षाअनुरुप प्रेरणादायी रह्यो पनि । तर, उनलाई नवयुगले फिका पारिदिए ।
Nepali-Football
यद्यपि, बंगबन्धु कपको प्रदर्शनका आधारमा नवयुग र विमलमा को उत्कृष्ट स्ट्राइकर भन्न मुस्किल पर्ने अवस्था थियो । सागको प्रदर्शनले नवयुग विमलभन्दा अगाडी देखिएका छन् । २५ वर्षीय नवयुगले आफ्नो र्फमलाई निरन्तरता दिनसके उनी नेपालले अहिलेसम्म उत्पादन गरेको सर्वोत्कृष्ट स्ट्राइकर सावित हुन सक्छन् ।
खेल कौशलको हिसाबले नवयुग र विमललाई हाराहारीमा राख्न सकिन्छ । तर, फिनिसिङमा नवयुग अब्बल देखिएका छन् । आफूले पाएको मौका सदुपयोग गर्ने उनको अठोट अत्यन्त बलियो छ । विमल र नवयुगको तालमेल मिलेको खण्डमा नेपालले बलिया टोलीहरुलाई पनि स्तब्ध पार्न सक्ने क्षमता देखाएको छ ।
भारतविरुद्ध के गर्लान् ?
मालदिभ्सविरुद्ध नवयुगको प्रदर्शनले फाइनलको प्रतिस्पर्धी भारत आतंकित बनेको हुनुपर्छ । यसको परिणाम, फाइनलमा भारतीय टोलीले नवयुगलाई सबैभन्दा बढि मार्क गर्ने छ । यसको फाइदा विमल र अन्जन विष्ट जस्ता स्ट्राइकरले उठाउनु पर्छ ।
यद्यपि, उत्कृष्ट स्ट्राइकर त्यो हो जसले चौतर्फी घेरावन्दीका बीचबाट पनि गोल निकाल्छ । विपक्षी खेलाडीले मार्क नगरेकाले मेस्सी सर्वश्रेष्ठ बनेका होइनन् । माल्दिभ्सविरुद्धको प्रदर्शनका कारण भारतविरुद्ध नेपाल आत्मविश्वासपूर्वक मैदानमा उत्रिनेछ ।
यी हुन् नवयुग ?
– इलामको मंगलबारेमा २०४७ सालमा जन्मेका नवयुग एक सरकारी शिक्षकका छोरा हुन् ।
-एन्फाले आयोजना गरेको १४ वर्षमुनिको राष्ट्रव्यापी जिविस फुटबल प्रतियोगिताको उपाधि दुईपटक इलामले लैजाँदा नवयुग टोलीका प्रमुख खेलाडी थिए ।
-फुटबलमा लागेर प्लस टु पास गर्न नसकेका नवयुग २०६५ सालदेखि सेनामा जागीर खान थाले । उनी नेपाली सेनाका सिपाही हुन् ।
-नवयुग आफूलाई फुटबलरभन्दा अगाडी नेपाली आर्मीका रुपमा चिनाउन रुचाउँछन् । एक महिनाअघि अनलाइनखबरसितको कुराकानीमा उनले भनेका थिए, ‘म पहिले नेपाली आर्मी हुँ, अनि मात्र फुटबलर ।’
-२०६९ सालमा सम्पन्न राष्ट्रिय लिगमा सर्वाधिक गोलकर्ता बनेका थिए नवयुग । अघिल्लो वर्षको प्रतियोगितामा पनि १४ गोल ठोक्दै उनी सर्वाधिक गोलकर्ता तथा प्लेयर अफ दि टुर्नामेन्ट घोषित भएका थिए ।
-नवयुगले पुनेमा आयोजित भारतसितको मैत्रीपूर्ण म्याचमा पहिलोपटक राष्ट्रिय टिमबाट डेब्यू गरे ।
यद्यपि, उनी पहिलो रोजाईमा थिएनन् । प्रतिस्थापनका रुपमा मैदान छिरेका उनले २५ मिनेट बिताएका थिए । त्यसपछिको साफ च्याम्पियनसिपमा उनलाई अनिल गुरुङको प्रतिस्थापनमा मैदानमा उतारिएको थियो ।
onlinekhabar
Post a Comment