पाँच महिनासम्मको वीरगन्ज नाकाबन्दीका बेला त्यहाँको मोर्चा सम्हाल्नुभएका नेता महतोले आज तस्करी र कालाबजारिया रोक्न पनि सबै नाका खुला गरिनुपर्नेमा जोड दिए ।
'अहिलेको आन्दोलनको स्वरुपबाट जनताले दुःख पाए, कि त सबै नाका बन्द गरौँ, होइन भने वीरगन्ज पनि खोलौँ भन्ने प्रस्ताव मोर्चाको अब बस्ने बैठकमा राख्नेछु, अब आन्दोलनसम्बन्धी ठोस निर्णय हुनुपर्छ भन्ने प्रस्ताव म बैठकमा लैजान्छु' - नेता महतोले भने ।
पाँच महिनासम्मको नाकाबन्दीले काठमाडौँलाई दबाब दिन नसकेकाले आन्दोलनको स्वरुप फेरिनुपर्नेमा उनको जोड थियो । नाकाबन्दीको आन्दोलनले मुलुकको अर्थ व्यवस्था बिग्रेकाले पनि स्वरुप फेर्ने प्रस्ताव गर्न लागिएको महतोको भनाइ थियो । मोर्चाको बैठक शनिबार बस्न सक्ने बताइएको छ ।
यता मोर्चाको प्रमुख घटक सङ्घीय समाजवादी फोरम नेपालका सहअध्यक्ष राजेन्द्र श्रेष्ठले भने नाका खोल्ने विषयमा जानकारी नभएको प्रतिक्रिया दिए । 'मोर्चाले वीरगन्ज नाका खोल्ने विषय हल्ला मात्र हो, यसबारे कुनै निर्णय भएको छैन, सञ्चारमाध्यममा आएको हल्लाले नाका खुल्दैन' - उनले भने ।
तराई–मधेस सद्भावना पार्टीका वरिष्ठ नेता रामनरेश रायले मोर्चाका शीर्ष नेता काठमाडौँ आएपछि बैठक बसेर ठोस निर्णय लिइने बताए ।
मोर्चाका नेता महतोको अभिव्यक्तिलगत्तै पाँच महिनादेखि बन्द वीरगन्ज नाका आज थप खुकुलो भएको बताइएको छ । महतो बाहेक मोर्चाका सबै शीर्ष नेता काठमाडौँ आइपुगेका छन् । नेता महतो पनि आज रातिसम्म काठमाडौँ आइपुग्नेछन् ।
annapurnapost
Post a Comment