काठमाडौं, २१ मंसिर । भारतीय विदेशमन्त्री सुष्मा स्वराजले नेपालमा परराष्ट्र मन्त्री कमल थापा मधेसी मोर्चाको माग सम्बोधन गर्ने भन्दै नेपाल गएको बताएकी छन् ।
उनले दिल्ली आउँदा थापालाई आपसी सहमतिबाट समाधान खोज्न र नाकाबन्दी अन्त्य होस् भनेको जानकारी दिइन् । उनले दिल्लीमा रहेका मधेसी मोर्चाका नेताहरुलाई ‘तपाईहरुको माग सम्बोधन हुन्छ, नभएर वार्ता गर्नुस्’ भनेको बताएकी छन् ।भारतको राज्यसभामा भएको नेपालबारे छलफलमा उठेको प्रश्नहरुको जवाफ दिँदै उनले ईश्वरले सायद अबको ५–७ दिनमा नेपालको समस्या समाधान हुने बताइन् । उनले भनिन्, ‘नेपालको समसया राजनीतिक सहमतिबाटै समाधान गर्ने वातावरण बनेको छ ।’
मन्त्री स्वराजले मधेसीलाई पनि न्याय हुने र दुःख पाएका नेपालीले पनि राहत पाउनेगरी राजनीतिक सहमतिबाटै समस्या समाधान चाहेको जिकिर गरिन् ।
आधा घण्टा लामो सम्बोधनमा उनले नेपाल सार्वभौम देश भएको र त्यसको भारत सरकारले सम्मान गर्ने बताइन् । उनले नेपालको आन्तरिक मामिलामा हस्तक्षेप गरेको आरोपलाई ठाडै खण्डन गरिन् । उनले भनिन्, ‘हामी प्रेस्क्रिप्सन दिँदैनौं र एक मित्र र शुभचिन्तकको नाताले सल्लाह दिन्छौं ।’
उनले भारतले ‘बिग ब्रोदर’ होइन ‘इल्डर ब्रोदर’को भूमिका निर्वाह गरेको स्पष्ट पारिन् ।
उनले भारतले नाकाबन्दी गरेको नभई नाकामा आन्दोलनकारीले आन्दोलन गरेका कारण नाकामा अवरोध भएको जिकिर गरिन् । उनले भनिन्, ‘खुला भएका नाकाहरुबाट अहिले पनि ट्रकहरु गइरहेका छन् ।’ उनले अवरोध भएको नाकाबाट सवारी साधन रिरुट गरेर अवरोध नभएको नाकाबाट पठाइरहेको स्पष्ट पारिन् । उनले आफू मानवीयताबाट नगिरेको भन्दै औषधी मागहरु इयर लिफ्ट गरेर पठाउने बताइन् । स्वराजले नेपालमा औषधिको अभाव भएपछि राजदूत पठाएर र विदेशमन्त्री कमल थापालाई आफैंले समेत अत्यावश्यकीय औषधिहरुको सूची दिनुस्, एयर लिफ्ट गरेर पठाउँछौं भनेको तर, अहिलेसम्म नेपालले कुनै सूची नदिएको स्पष्ट पारिन् ।
उनले भारतले गलत बाटो अपनाउन नचाहेको बताइन् । उनले भनिन्, ‘पहिलो विकल्प गोली चलाएर हटाउने हो, दोस्रो विकल्प आन्दोलनकारीलाई ट्रकले किचेर अगाडि बढ्ने हो ।’ उनले यी दुवै बाटोलाई गलत बाटो भएको बताइन् । ‘राजनीतिक सहमति गर भन्ने हाम्रो सुझाव हो,’ उनले भनिन्, ‘हामीले त्यसैलाई काम गरिरहेका छौं ।’
आक्रामक रुपमा प्रश्नहरुको जवाफ दिएकी स्वराजले नेपालमा अन्तरिम संविधानभन्दा पछाडि फर्किएकोले आन्दोलन भएको बताइन् । भारतले मधेसमा आन्दोलन भयो भने दुवै देशलाई अप्ठेरो पर्छ भनेर पहिले नै भनेको स्वराजले दावी गरिन् । उनले राष्ट्रपति विद्या भण्डारी, डा.बाबुराम भट्टराई, प्रचण्ड र शेरबहादुर देउवा भारत आउँदा र स्वराज नेपाल जाँदा यही सुझाव दिएको स्मरण गरिन् ।
उनले बिनाबहस र बिना तयारी संविधान जारी गरेको, मधेसीको माग पूरा गर्नुभन्दा पनि अन्तरिम संविधानभन्दा पछाडि फर्किएको बताइन् । उनले अन्तिम समयमा विशेषदूतको रुपमा विदेश सचिव एस जयशंकरलाई पठाएको स्मरण गर्दै भनिन्, ‘अन्तरिम संविधान भन्दा पछाडि नफर्कनुस्, आन्दोलन भए हामीलाई पनि गाह्रो पर्छ भनेर सल्लाह दिएका थियौं । यदि हामीले भनेजस्तो गरिएको भए एक दिनपनि आन्दोलन हुने थिएन ।’
sajhapost
Post a Comment