वीरगन्जमा भारतबाट ल्याइएको करोडौंको कच्चा पदार्थ नष्ट

वीरगन्ज, पुस २१ । मधेसी मोर्चाको आन्दोलन र भारतीय नाकाबन्दीका कारण वीरगन्ज नाकाबाट भित्र्याउन ल्याइएको करोडौं रुपैयाँ बराबरको औद्योगिक कच्चा पदार्थ खेर गएको छ ।
वीरगन्ज नाका ठप्प भएकाले नेपाल भित्र्याउन लागिएको औद्योगिक कच्चा पदार्थ सिमा तथा भारतीय रेल्वेको रक्सोलस्थित गोदामबाहिर जथाभावी अनलोड गरिएको छ ।

खुला ठाउँमा राखिएका सामान घाम र पानीले काम नै नलाग्ने भएको व्यापारीहरु बताउँछन् । आयातकर्ताले रक्सोलसम्म आइपुगेको सामान बन्द र नाकाबन्दीका कारण गन्तव्यसम्म पु¥याउन पाएका छैनन् ।
खुला ठाउँमा जथाभावी राखिएका क्लिङ्कर, सिमेन्ट, खाद्यान्न, नुनजस्ता सामान पानीले भिजेर बिग्रिएका हुन् । कच्चा पदार्थ नष्ट हुनुका साथै भारतीय रेल्वेले लिने जरिवानाले करोडौं रुपैयाँको नोक्सानी भएको व्यापारीहरु बताउँछन् ।
वीरगन्ज नाकाबाट मात्र करिब एक दर्जन सिमेण्ट उद्योगले कच्चा पदार्थ आयात गर्दछन् । भारतीय रेल्वेले यार्डमा अनलोड भएको १२ घण्टाभित्र सामान नउठाए विलम्ब शुल्क लिने गरेको छ ।
imagekhabar