नेपालगन्ज । घुससहित पक्राउ परेपछि नेपाल प्रहरी र अख्तियार दुरुपयोग अनुसन्धान आयोगको टोलीबिच तीन घण्टा विवाद भएको छ । नेपाल प्रहरीका एक अधिकृत बाँकेमा घुस लिदा लिँदै पक्राउ परेका थिए । पक्राउ गर्ने अख्तियारको टोली र प्रहरीबिच शुक्रबार राति तीन घण्टासम्म घम्साघम्सी भएको थियो।
नेपालगन्ज धम्बोजीस्थित क्रसरोड होटलमा सेवाग्राहीबाट २५ हजार घुससहित प्रहरी नायव निरीक्षक सुमन खरेलसहितका प्रहरी र अख्तियारको टोलीबिच घम्साघम्सी भएको थियो ।
जिल्ला प्रहरीमा परेको एक उजुरी मिलाईदिन्छु भन्दै उनले सेवाग्राहीबाट पटक पटक घुस लिएको गुनासो अख्तियारमा पुगेपछि निगरानी बढाइएको थियो । अख्तियारको निगरानीमा परेका सई खरेलले शुक्रबार राति पुन सेवाग्राहीबाट २५ हजार घुस लिन लागेका थिए । कोहलपुरस्थित सम्पर्क कार्यालयको टोलीले सई खरेललाई घुससहित रंगेहात पक्राउ गरेपछि उनका समर्थक र करिब ५० जनाको संख्यामा आएको प्रहरीको समूह अख्तियारको टोलीमाथि जाई लागेका थिए ।
सई खरेल फन्दामा परेपछि अख्तियारको टोलीलाई प्रहरीको क्षेत्री अनुसन्धान व्यूरो (सिआईबी), घुमुवा प्रहरी र केही सर्वसाधरणसहित करिब ५० जनाको समूहले समेत घेरा हालेर आक्रमणको प्रयास गरेका अख्तियारको कोहलपुरस्थित कार्यालयले जनाएको छ ।
चोरी मुद्धामा माघ २१ मा पक्राउ परेका भाइ युधिर सिंहलाई छुटाइदिने शर्तमा बाँकेकै युवाराज सिंहबाट २५ हजार घुस लिँदै गरेको अवस्थामा सई खरेललाई अख्तियारको टोलीले पक्राउ गरेको थियो ।
जिल्ला प्रहरी कार्यालय बाँकेका डिएसपी सुशीलसिंह राठौरले सई खरेलले युधिर सिंहलाई छुटाईदिने शर्तमा घुस लिँदै गर्दा अख्तियारको टोलीले पक्राउ गरेको पुष्टि गरे ।
अख्तियारले सई खरेललाई पक्राउ गरेपछि ठूलो संख्यामा पुगेका प्रहरीले अख्तियारको टोलीलाई होटलमै तीन घण्टासम्म घेरा हालेका थिए । सो क्रममा सई खरेललाई पक्राउ गर्ने अख्तियारका केही कर्मचारीमाथि प्रहरीले हातपात समेत गरेका अख्तियारको कोहलपुरस्थित कार्यालयका प्रमुख बसन्त कुवँरले जानकारी दिए ।
प्रहरीले पक्राउ परेका खरेललाई त्यहाँबाट लान नदिएपछि अख्यिारको टोलीले केन्द्रीय कार्यालयसँग गुहार मागेको थियो । स्रोतका अनुसार अख्तियारका प्रमुख लोकमान सिंह कार्कीले प्रहरी महानिरीक्षक उपेन्द्रकान्त अर्यालसँग टेलिफोनबाट कुराकानी गरेपछि मात्रै प्रहरीले खरेललाई होटलबाट लान दिएका थिए ।
‘हामीले सईलाई रंगेहात पक्राउ गरेका थियौं । करिब ५० जनाको समूहमा आएकाहरुले हामीलाई आक्रमणको प्रयास गरे’, अख्तियारको सम्पर्क कार्यालयका प्रवक्ता जंगबीर डाँगीले भने, ‘सप्रमाण पक्राउ गरेको व्यक्तिलाई कसैको दबाब आएर छोड्ने कुरै भएन । हामीमाथि आक्रमण प्रयास गर्नेहरु प्रहरी भएको खुलेको छ । त्यसबारे पनि अनुसन्धान थाल्दैछौं ।’
पक्राउ परेका खरेल सादा पोशाकमा नेपालगन्ज क्षेत्रमा खटिन्थे । केही दिनअघिमात्र सरुवा भएर आएका बाँकेका प्रहरी प्रमुख एसपी शेखर कोइरालाका विश्वासपात्रका रुपमा उनी चिनिन्थे । एसपी कोइरालाको विश्वासपात्र बनेपछि उनले घुमुवा प्रहरीको जिम्मेवारी पाएका थिए । भिडियो हेर्न तलको बाकस थिच्नुहोस
Post a Comment