कोइराला भेट्न भारतीय राजदूत रे महाराजगञ्ज पुगे, मधेस आन्दोलन सुल्झाउन दुई सुझाव

काठमाडौं, १३ मंसिर । पछिल्लो समय नेपालविरुद्ध गतिविधी गरिरहेको आरोप खेपिरहेका भारतीय राजदूत रञ्जीत रेले नेपाली कांग्रेसका सभापति एवं पूर्व प्रधानमन्त्री सुशील कोइरालासँग भेटवार्ता गरेका छन् ।
भर्खरै अमेरिकाबाट फर्किएका कोइरालासँग राजदूत रेले आइतबार विहान महाराजगञ्जमा भेटवार्ता गरी मधेस आन्दोलन सुल्झाउन आग्रह गरेका छन् । उनले प्रधानमन्त्री केपी शर्मा ओली नेतृत्वको सरकारले समस्या समाधानमा ढिलाई गरेको बताउँदै समस्या समाधानको नेतृत्व लिन कोइरालाई आग्रह गरेको कोइराला निकट एक नेताले बताए ।

त्यसका लागि राजदूत रेले मधेसमा दुई प्रदेश बनाउनु उपयुक्त हुने र सबै मधेसीलाई समान अधिकार दिनुपर्ने सुझाव दिएका छन् । यद्यपी यो नेपालको मामिला भएको र भारतले दिएका सुझावले छिटो समस्या समाधान हुने विश्वास राजदूत रेले कोइरालासँग गरेका छन् ।
कोइराला निवास महारागंजमा एकघण्टा बढी भएको भेटवार्तामा भारतीय नाकाबन्दी, मधेस आन्दोलन र समाधानका विषयमा छलफल भएको थियो ।
जवाफमा कोइरालाले मधेसका जायज माग सम्बोधन गरिने बताए । आन्दोलनले देशभरिको जनजीवन कष्टकर बनेको भन्दै कोइरालाले समस्याको निकास खोज्न आन्दोलनरत मधेसकेन्द्रित राजनीतिक दल र सत्तारुढ दलसँग अमेरिकाबाट फर्के लगत्तै छलफल अघि बढाएका थिए ।
dainiknepal